(سكتش )
نور الدين مهران
- التحرير يا اسطى
= اتفضل
- شكراً يا اسطى . العربية دى بتاعتك ولا شغال عليها ؟
= بتاعتى الحمد لله
- فيات هى صح ... اعتقد 128
= اه على قدنا بقى
- الله يوسع عليك ..على فكرة انت واضح انك محترم وابن ناس يا اسطي .
= الله يخليك
- لاء وبَشوش كده ووشك سِمح . تعرف انا شوفت اسطوات كتير لكن أول مره اشوف أسطى بالشكل ده . الخدود الحمرا والعيون الزرق والشعر الاصفر السايح ده . هو انت منين يا اسطى
= فى ايه يا استاذ انت راكب مع مزة ولا ايه . ما تحترم نفسك . انت من اياهم ولا ايه
- لاء لاء ماتفهمنيش غلط . انا والله مش كده خالص . انا بس بحب اعرف اصول الناس ايه .
= وده ليه ان شاء الله !
- بص يا اسطى . شايف الورق ده
= اه ياسيدى شايفه
- ده بقى بحث انا بعمله عن الأصول المتعددة للشعب المصري . ده بحث مهم جداً تابع لمنظمة اليونيسكو . يعنى انت بصفتك سواق تاكسي مش بيركب معاك زباين بشرتهم سمرا وشعرهم مُجعد ومناخيرهم مفلطحه صح ولا لاء ؟
= اه صح
- وبيركب معاك برضه ناس شعرهم اسمر وعنيهم خضرا وناس شعرهم اصفر وعنيهم سمرا وناس اصفر فى اخضر وناس احمر فى بنى وناس ...
= ايوه يا استاذ كل دول بيركبوا معايا . إيه الغريب يعني
- طيب عمرك ما سألت نفسك ازاي كل دول مصريين رغم ان اشكالهم مختلفة . مش ده دليل على ان اصولهم مختلفه ؟
= تمام
- اهو انا بقى عايز اعرف اصلك منين عشان اسجل حالتك دى واربطها بالاصول اللى انت منحدر منها . ها انت منين بقى يا اسطى
= من القللي
- لاء يعنى قبل ما تروح القللى . كان اصلك منين
= كنا فى الشرابيه
- ياسيدى قبل ده كله . العيله نفسها أصلها كانت من فين . . ابوك الله يرحمه ماقالكش
= ابويا عايش ياعم
- طب مقالكش ؟
= اه قاللي قبل كده ان احنا أصلنا من المنصورة
- تمام . المنصورهحصل فيها فعلاً خلط جينات كتير بسبب الحملات الأجنبية واستقرار اجانب كتير فيها وزواجهم من مصريين ومصريات . يعنى انت ممكن تكون من أصول فرنسيه أو مملوكيه جركسية او من بلاد ما وراء النهرين . انا هدرس بقى الاحتمالات دى . وانا كتبت التقرير خلاص اهو . لو سمحت بس ممكن ناخد صوره سوا عشان ارفقها بالتقرير .
= بس يا استاذ .!
- هديك 100 جنيه . لو سمحت ساعدني ..مستقبلى كله متوقف على البحث ده .
= ماشى ياسيدي اتفضل صور
- اوك الابتسامة الجميلة بقى . امسك الظرف ده ف ايدك كده عشان بس الصورة تبقى اكاديمية
= فيه ايه الظرف ده
- ده فيه التقارير بتاع البحث.. كل تقرير منهم فيه شخصية زى حضرتك كده . وانا شاء الله الصور كلها هتنزل فى كتاب وهيتنشر فى كل دول العالم
= ماشى .
- اوك يا اسطى اسمك الرباعي لو سمحت وعنوان السكن ونمرة البطاقة
= محمود عبد الله حسن ابراهيم ..القللى . شارع الموقف . . البطاقه اهى .
- المهنة لو سمحت
= سواق
- طب ممكن رخصة العربية. هنقل بيناتها بس عشان نثبت انك سواق .
= لازم يعنى .
- اه توثيق مش أكتر
= ماشى اتفضل
- اوك انا خلاص خلصت . امضتك بقى الجميله هنا عشان تأكدلي انك موافق على نشر حالتك دى فى الكتاب . ده اجراء روتينى عشان الحقوق الشخصية للحالات المدروسة .
= ياسيدى انا موافق من غير امضا ولا حاجه
- ماينفعش يا اسطى والله . هيتقالي فين موافقات الناس دول . عشان متبقاش حالات وهميه . لازم تكون حالات من الواقع فعلا . عشان مصداقية البحث . انت يعنى يرضيك تضيع تعبي ؟
= لاء طبعا مايخلصنيش . وادى الإمضا
- تمام كده ..شكرا ياسطى نزلنى هنا بقى لو سمحت . اتفضل آدي أجرة المشوار وآدى 100 جنية عشان البحث . مبسوط كده ؟
= روح الله يوفقك
- سلام يا اسطى . ابقى استنى الكتاب . هيعجبك اوى
( بعد فتره )
- انت الاسطي محمود
= ايوه انا.. انتوا مين
- احنا تنفيذ الاحكام
= وعايزين ايه !!
- عايزين العربية اللى بعتها لصالح المواطن وليد عبد الله اسماعيل . وممتنع عن تسليمها
= بس انا مابعتش حاجه .
- دانت بايع وماضي وقابض والراجل مصورك وهو بيديك ظرف الفلوس . المفاتيح ياروح امك
#سيكتشات_مهران
.........................