أضحكتنى هذه النصائح العشر التى يقدمها «د خالد أمين»، كى يتجنب المرضى سرقة أعضائهم. والحق أن هذا المقال الساخر خفيف الدم هو فى حقيقته جرس إنذار لما يتعرض له الأطباء من إهانات واتهامات. إهانات تصل إلى الضرب، بالذات فى أقسام الطوارئ، حيث يأتى أقارب المرضى متحفزين قبل أن يحدث شىء. واتهامات (عبيطة) بسرقة أعضائهم وكأنما زرع الأعضاء يقوم به جزار، وليس عملا فنيا متخصصا شديد المهارة والتعقيد.
أترككم مع خفة الدم المصرية التى هى ماركة مسجلة لا يصلح معها التقليد.
■ ■ ■
عشر نصائح كى تتجنب سرقة أعضائك.
١- ماتروحش الطوارئ أبداً إلا لمشكلة طارئة وخطيرة وفى أضيق الحدود، الدكتور اللى هتقلقه عالفاضى ده هيحاول ينفس عن غضبه منك وغالبا هيفكر فى سرقة أعضائك خاصة أن الدنيا بتبقى هادية ومحدش هيلاحظ.
٢- متفاصلش أبدا فى فلوس الدكتور أو فلوس العملية، مين عارف الألف جنيه اللى هتنزلها دى ممكن الدكتور يحاول يعوضها بسرقة كلية أو خصية أو فص من كبدك؟
٣- متجادلش دكتور التخدير، ولو قالك ينيمك نصفى يبقى تنام نصفى ومتطلبش تنام كلى، ولو قالك موضعى قل له من غير بنج، لازم تكون مصحصح والجراح شغال.
٤- إوعى تتخانق مع الدكتور علشان مريض لك فى المستشفى، الدكتور اللى هتضربه ده ممكن يسرق مخ مراتك فتتجنن أو يسرق قناة فالوبها من خلال خرم صغير جدا جنب السرة، وتعيش طول حياتك مش عارف مراتك بتسقط ليه كل مرة فى الشهر الرابع.
٥- لو انتى منتقبة لازم تكشفى النقاب وانتى بتكشفى عند الدكتور علشان ميتلخبطش بينك وبين عيانة هو ناوى يسرق أعضائها.
٦- لازم تدى دكتورك فلوس وهدايا كتير عشان ميبقاش محتاج فلوس فيضطر يسرق أعضائك.
٧- ما تاخدوش أطفالكم معاكم المستشفى؛ الأطفال كائنات مستهدفة؛ لأن أعضاءهم صغيرة وممكن تتزرع (تقاوى) وتكبر وتتعمل إنسان جديد.
٨- متروحش تشتكى لمدير المستشفى من أى حاجة؛ مدير المستشفى غالبا رئيس العصابة وحيسرق أعضاءك وهو بيفهمك إنه بيحل لك المشكلة.
٩- لا تذهب للدكتور الكبير أبو كشف غالى لأن ده غالبا بيسرق أعضاء مهمة زى الكبد والمخ والجمجمة، روح للدكتور الشاب- مثلى- لأنه لو سرق حيسرق عضو صغير.
١٠- العيادات الخاصة هى المكان اللى تكشف فيه لأنها غير مجهزة لسرقة الأعضاء، خصوصا لو حتدفع مستعجل بيكون الدكتور معندوش وقت يسرق.
وربنا يستر علينا جميعا.
